ஐந்து தமிழ் மீனவர்களுக்கு மரண தண்டனையா? கருணாநிதி கண்டன அறிக்கை

இந்தத் தீர்ப்பினைக் கண்டித்து தமிழகத்திலே உள்ள மீனவர்கள் பல்வேறு போராட்டங்களைத் தொடங்கி, பல இடங்களில் வாகனங்களை உடைத்திருக்கிறார்கள். ராமேஸ்வரத்தில் மீனவர்கள் மத்தியிலே பெரும் கொந்தளிப்பு ஏற்பட்டுள்ளது. 500 மீட்டர் தூரத்துக்கு தண்டவாளம் சேதப்படுத்தப்பட்டுள்ளது. அரசுப் பேருந்து எரிக்கப்பட்டுள்ளது. தூக்குத் தண்டனை விதிக்கப்பட்ட மீனவர்களின் மனைவிகள் தங்கள் கணவர்களைக் காப்பாற்ற வேண்டுமென்று கண்ணீரோடு பேட்டி அளித்திருக்கிறார்கள்.

கைது செய்யப்பட்டு, இப்போது தூக்குத் தண்டனை விதிக்கப்பட்டுள்ள இந்த ஐந்து மீனவர்களைப் பற்றி, அவர்கள் சிறையிலே இருந்த போதே, மாநிலங்களவை கழகக் குழுத் தலைவர், கனிமொழி 13-12-2011 அன்றே மாநிலங்களவையில் பிரச்சினை எழுப்பி ஐக்கிய முற்போக்குக் கூட்டணி ஆட்சியிலே மத்திய அரசின் கவனத்திற்கு கொண்டு வந்தார்.

இவர்களுக்கு நீதி மன்றம் தூக்கு தண்டனை விதித்ததை எதிர்த்து, கொழும்பு நகரில் உள்ள இந்தியத் தூதரகம் வழக்கறிஞர்கள் மூலம் இலங்கை உச்ச நீதி மன்றத்தில் “மேல் முறையீடு” செய்யும் என்று வெளியுறவுத் துறை அமைச்சகத்தின் செய்தித் தொடர்பாளர் சையது அக்பருதீன் டெல்லியில் தெரிவித்திருக்கிறார்.