இசைக் கலைஞர் மாண்டலின் ஸ்ரீநிவாசன் காலமானார் – பிரதமர் நரேந்திர மோடி இரங்கல்

உடல் நலக் குறைவு காரணமாக மருத்துவமனையில் அனுமதிக்கப்பட்டிருந்த மாண்டலின் ஸ்ரீநிவாசன் மரணம் அடைந்தார்.

சென்னை வடபழனியில் உள்ள தனியார் மருத்துவமனையில் உடல் நலக் குறைவு காரணமாக அனுமதிக்கப்பட்டிருந்த பிரபல இசைக் கலைஞர் மாண்டலின் ஸ்ரீநிவாசன் இன்று காலை 9.30 மணிக்கு காலமானார்.

1969ஆம் ஆண்டு பிப்ரவரி 28ம் தேதி, ஆந்திர மாநிலம், மேற்கு கோதாவரி மாவட்டத்தில் பிறந்தவர் ஸ்ரீநிவாசன். இவரது தந்தை சத்யநாராயணன் மாண்டலின் இசைக் கலைஞராவார். அவரிடம் இசைக் கருவியை இசைக்கக் கற்று மிக சிறந்த கலைஞராக விளங்கினார்.

இவரது சகோதரர் மாண்டலின்  ராஜேஷும் சிறந்த இசைக் கலைஞராவார்.

மாண்டலின் வாத்தியக் கருவியை இசைப்பதில்  நிபுணத்துவம் பெற்று விளங்கிய ஸ்ரீநிவாசன், பத்மஸ்ரீ, சங்கீத ரத்னா, சங்கீத பால பாஸ்கரா, தேசிய குடிமகனுக்கான விருது, ராஜீவ் காந்தி தேசிய விருது என பல்வேறு விருதுகள் பெற்றுள்ளார்.

தமிழக அரசினால் ஆஸ்தான வித்வான் என்ற பட்டத்தையும் அவர் பெற்றுள்ளார்.

 பிரதமர் நரேந்திர மோடி இரங்கல்

மேண்டலின் இசைக்கலைஞர் ஸ்ரீனிவாஸ் மறைவுக்கு பிரதமர் நரேந்திர மோடி இரங்கல் தெரிவித்துள்ளார்.

இது குறித்து தனது டிவிட்டர் பக்கத்தில் வெளியிட்ட செய்தியில், மேண்டலின் ஸ்ரீனிவாஸின் அர்ப்பணிப்பு மற்றும் இசை உலகுக்கு அவர் அளித்த நெடிய சேவைக்காக அவர் என்றென்றும் நினைவுகூரப்படுவார் என்று கூறியுள்ளார்.

The Prime Minister expressed grief on the passing away of renowned musician Shri Uppalapu Shrinivas.

— PMO India (@PMOIndia) September 19, 2014

 

PM recalled the Mandolin Maestro’s dedication & long-standing contribution towards music & added that he will always be remembered.

— PMO India (@PMOIndia) September 19, 2014

ஏ.ஆர்.ரகுமான் இரங்கல்

மேண்டலின் இசைக்கலைஞர் ஸ்ரீனிவாஸ் மறைவுக்கு இசையமைப்பாளர் ஏ.ஆர்.ரகுமான் உள்ளிட்ட பிரபலங்கள் தங்கள் இரங்கலைத் தெரிவித்துள்ளனர்.

மேண்டலின் ஸ்ரீனிவாஸ் மறைவு குறித்த செய்தியைக் கேட்டதும் தாம் மிகவும் உணர்ச்சிவசப்பட்டதாகவும், அவரது மறுமை உலகம் மகிழ்ச்சியுடன் இருக்க கடவுள் அருளட்டும் என்றும் ஏ.ஆர்.ரகுமான் தனது டிவிட்டர் பக்கத்தில் இரங்கலைத் தெரிவித்துள்ளார்.

 

Emotionally shaken to hear of Carnatic shining star Mandolin Shrinivasji’s demise… May God bless him with happiness in the next world…

— A.R.Rahman (@arrahman) September 19, 2014

 

மேலும், பாடகி சுசித்ரா, நடிகர் சித்தார்த் உள்ளிட்டோரும் தங்கள் இரங்கலைத் தெரிவித்துள்ளனர்.